لو كان
لو كان الدّمعة تفيد
وترجّع الحزن أعياد
وتحيي ذكرى زمان بعيد
وتصنع من الذلّ أمجاد
نبكيك يا حرّة ونزيد
نعدّد تاريخ الأجداد
نبكيك يا بغداد و نزيد
نبكي مستقبل الأولاد
أمّا إلّي هزّو الحديد
ما يرجع يوم بالحداد
تنكيس العلم ما يفيد
ومايرجّع العبيد أسياد ...
لو كان الرّوح تكفيك
شرّ الظّلم و الهلاك
وتزرع الفرحة في عينيك
وترمي حمل الحزن وراك
الرّوح ليك ملك يديك
والدمّ يا فلسطين فداك
بالرّوح والدمّ نشريك
ما أرخصهم وما أغلاك
أمّا يا حسرتي عليك
يا الأقصى اللّه يرعاك
الروّح ما تسواش فرنك
عند شارون السفّاك ...
لو كان الدّمعة تفيد
وترجّع الحزن أعياد
لو كان الرّوح تكفيك
شرّ الظّلم و الهلاك
نبكيك يا حرّة ونزيد
نعدّد تاريخ الأجداد
وبالرّوح والدمّ نشريك
ما أرخصهم وما أغلاك
أمّا إلّي هزّو الحديد
ما يرجع يوم بالحداد
"سيدي عربي" البركة فيك
شمس العروبة في سماك